ምምሕዳር ባራክ ኦባማ፡ ንስለ ጸጥታን ምርግጋእን ቀርኒ ኣፍሪቃ ብሓፈሻ፡ ብፍላይ ከኣ ንስለ ሰላምን ምርግጋእን ሶማል ክብል፡ ንስርዓተ-ምምሕዳር ኢሰያስ መተባቢብዒ ጉንዖ ንክልግሰሉ፡ ኢናፍ ፕሮጀክት ኣብ ዝዘርግሖ መጽናዕታዊ ጽሑፍ ምሕጽንታ ኣቅሪቡ።

ዮሩፕያን ቮይስ ዝተባህለ ማዕከን ዜና፡ ኤውሮጳዊ ሕብረት፡ ንስርዓት ኢሰያስ ናይ 122 ሚልዮን ዩሮ ገንዘባዊ ሓገዝ ክልግስ ወጢኑ ከምዘሎ ይገልጽ።

ስርዓተ-ምምሕዳር ኢሰያስ፡ ንናይ ውዱብ ሕቡራት ሃገራት እማመ ክቅበልን፡ ወተሃደራቱ ከኣ ካብ መሬት ጅቡቲ ንክስሕብ ማሕበር እስላማዊ ጉባኤ፡ ጻውዒት ሂቡ ክብል ረሊጆስ ኢንተልጀንስ ዝተባህለ ማዕከን ዜና ይገልጽ።

ደያኑ ኣህጉራዊ ቤት ፍርዲ ገበን፡ ኣብ ልዕሊ ፕረዲሰንት ኣል በሽር ክሲ ክምስረት ድሮ ከምዝወሰኑ ንሰበስልጣንን ዲፕሎማስያታትን ውድብ ሕቡራት ሃገራት ብምጥቃስ ዝተፈላለዩ ኣህጉራውያን ማዕከናት ዜና ይገልጻ።

ኣብ መንጎ ሓባራዊ ኣወሃሃዲት ኣካል ሰልፊ ደሞክራሲ ኤርትራን ሰልፊ ህዝቢ ኤርትራን፡ ከምኡ እውን ኤርትራዊ ህዝባዊ ምንቅስቓስ፡ ኣብ ፍራንክፈርት ርክባት ክካየድ ከምዝቐነየን ብጽቡቕ ‘ውን ከምዝተዛዘመ ኣቦ-ወንበር ኤርትራዊ ህዝባዊ ምንቅስቃስ፡ ኣቶ ኣድሓኖም ገብረማርያም፡ ከምዝሓበረ ይፍለጥ።

ሓንቲ ካብ’ተን ኤርትራውያን ህቡባት ናይ ጕያ ተቐዳዳሚቲ፡ ስምረት ስልጣን፡ ኣብ ዓባይ ብሪጣንያ ዑቝባ ከምዝሓተተት ንሓርነት ዳት ኮም ይገልጽ።

ኣብ ኤርትራ ኣብ መንጎ እቶም ናይዚ እዋን ርኹባት ተባሂሎም ዝስመዩ እሙናት ኣገልገልቲ ስርዓት-ምምሕዳር ኢሰያስን እቲ ስኡን፡ ማለት እቲ ሰፊሕ ክፋል ሕብረተሰብ ኤርትራን ዘሎ ናይ መነባብሮ ጋግ ኣዝዩ እንዳሰፍሐ ይኸይድ ከምዘሎ ኣብ ውሽጢ ዓዲ ዝርከቡ ምንጭታትና ሓቢሮም።

መራሒ ሊብያ ሞዓመር ቃዛፊ፡ ናይ ምጽዋዕ ዑደቱ ፈጺሙ፡ ናብ ሃገሩ ትሩፕሊ፡ ብቅድሚ ትማሊ ከምዝተመልሰ መርበብ ሓበሬታ ስርዓት ኢሰያስ፡ ሻባይት ዳት ኮም ሓቢሩ። ቃዛፊ ኣብ ዑደቱ፡ ምስ ፕረሲደንት ኢሰያስ ከምዝተራኸበ እውን እቲ መርበብ ሓበሬታ ወሲኹ ይገልጽ።

ኣብ ኤኮኖሚያዊ መዳይ፡ ስርዓት ኢሰያስ፡ ኣብቲ ኣብ ወጻኢ ዝነብሩ ኤርትራውያን ዜጋታት፡ ብቐጻሊ ናብ ኤርትራ ዝልእኽዎ ገንዘብ፡ ብቀጥታ ይኹን ብተዘዋዋሪ ዝያዳ ምርኩስ ከምዝገብር ስትራቴጂ ፔጅ ሓቢሩ።

ካብ 2001 ኣትሒዙ፡ ብዘይገለ ክሲ ኣብ ትሕቲ ጽኑዕ ማእሰርቲ ዝጸንሐ፡ ኤርትራዊ ሽወደናዊ ዳዊት ኢሳቕ፡ ንሕክምና ናብ ሆስፒታል ከም ዝተመሓላለፈ፡ ን “ሜትሮ” ዝተባህለ ሽወደናዊ ጋዜጣ ጠቒሱ፡ መርበብ ሓበሬታ ን ሓርነት ዳት ኮም ኣፍሊጡ።