መንግስቲ ኣልበሽር፡ ናይ ኣመሪካ ሓይሊ ኣየር፡ ኣብ ልዕሊ ብዘይሕጋዊ ኣገባብ ኣብ መሬት ሱዳን ዝጓዓዝ ዝነበረ ወተሃደራዊ ኣጽዋራት፡ ናይ ነፈርቲ ደብዳብ ኣካያዳ ክብል ከምዝኸሰሰ ግብጻዊ ጋዜጣ ኣል ሹሩቕ ትማሊ ሰለሱ ኣፍሊጡ።

ካብ ዝሓላፉ ሒደት ሰሙናት ኣትሒዙ፡ ስርዓት ኢሰያስ፡ ዝኾነ ኣባል ወትሃደራዊ ዕስክርና ዝኾነ ዜጋ፡ ተንቀሳቃሲት ቴለፎን፡ ወይ ሞባይል፡ ንኸይጥቀም መምርሒ ከምዘመሓላለፈ፡ ባውዛ ተባሂሉ ብናይ ብርዒ ሽም ዝፍለጥ ዜጋ፡ ኣብቲ ናብ መርበብ ሓበሬታ ኣዝማሪኖ ዳት ኮም ዝለኣኾ መልእኽቲ ይሕብር።

ኣብቲ ካብ ቁጽጽር ስርዓት ኢሰያስ ናጻ ዝኾነ ናይ ንግድን ሓዋላን መርበባት፡ ሸርፊ ባጤራ ዶላር ኣሜሪካ፡ ብመንጽር ናቕፋ ልዕሊ 40 ገጹ ደይቡ ከምዘሎ ምንጭታትና ይሕብሩ።

ሰለስተ ብዕድመ ዝደፍኡ ተኸተልቲ ጴንተኮስታል፡ ኣመንቲ ክርስትና፡ ትማሊ ዓርቢ ዋሕስ ተጌሩሎም ካብቲ ተኣሲሮምሉ ዝነበሩ ወታሃደራዊ ቤት ማእሰርቲ ዋሕስ ጌሮም ከምዝተለቐቁ መሰል ክርስትያናት ዝከታተል ጉጅለ ኣረጋጊጹ።

ስርዓት ኢሰያስ፡ ካብ ዝሓለፈ ሰሙን ኣትሒዙ፡ ነዳዲ ንህዝቢ ምዕዳል ደው ኣቢሉዎ ከምዘሎ፡ ንኣስመራ ዝርከቡ ምንጭታቱ ጠቂሱ መርበብ ሓበሬታ ኣሰና ሓቢሩ።

ኣምባሳደር እስራኤል ኣብ ኢትዮጵያ፡ ሚስተር ኦደድ ቤን ሃይም፡ ስርዓት ኢሰያስ ንሰላም ቀርኒ ኣፍሪቃ ንምዝራግ ተዋፊሩ ከምዝርከብ፡ ከምኡ ‘ውን መዕቆቢ ግብረ-ሽበራውያን ኮይኑ ከምዘሎ፡ ዎርልድ ዎር 4 ሪፖርት ተባሂሉ ዝፍለጥ መርበብ ሓበሬታ ኣፍሊጡ።

ስርዓት ኢሰያስ፡ ኣብዚ ሒዝናዮ ዘሎና ዓመት፡ ብጥዕና ምኽንያት፡ ንኣባላት ሃገራዊ ወትሃደራዊ ዕስክርና፡ ካብ ዕስክርና ብብዝሒ የፋንዎም ከምዘሎ ኣብ ኣስመራ ዝርከቡ ምንጭታትና ሓቢሮም።

ቀንዲ ጠንቂ ጸገምን መከራን ኤርትራዊ ሕብረተሰብ፡ ካብቶም ቅድም ክብሉ፡ ልዑል ተቀባልነት ዝረኸቡ ኣሉታዊ ጽልዋ ዘለዎም ኣሰራርሓን ባህልን ገድሊ ዝነቅል ምዃኑ ዝተፈላለዩ ወገናት ይገልጹ።

ሚኒስተር ሚኒስትሪ ዜና ስርዓት ኢሰያስ፡ ኣቶ ኣሊ ዓብዱ፡ ነቲ ብኣህጉራዊ ቤት ፍርዲ ገበን ኣብ ልዕሊ ኣልበሽር ተወሲዱ ዘሎ ናይ እስራት ስጉምቲ፡ ንፕረሲደንት ኣልበሽር ጥራይ ዘይኮነስ፡ ንስርዓት ኢሰያስ ‘ውን ኣዝዩ ኣስጋኢ ከምዝኾነ ኣብቲ ንማዕከን ዜና ጋልፍ ኒዊስ ዝሃቦ ቃል ኣፍሊጡ።

ዋላ ‘ኳ ስርዓት ኢሰያስ ኣብ ልዕሊ ዜጋታት ምዕራባውያን ሃገራት ዘለዎ ጽልኣት ብወግዒ ዝገልጽ እንተኾነ፡ ኢጣልያውያን ነጋዶ ግን ኣብ ቅድሚ ፕረሲደንት ኢሰያስ ፍሉይ ሓለፋ ከምዝረኽቡ፡ ነዚ ጉዳይ ብቀረባ ዝከታተልዎ ዘለው ወገናት ይሕብሩ።