ዓርባዕተ ናይ ተቛውሞ ሰልፍታት፡ ማለት ተጋድሎ ሓርነት ኤርትራ፣ ኢስላሕ፣ እስላማዊ ምንቅስቃስ ከምኡ ‘ውን ፈደራላዊ ዲሞክራስያዊ ምንቅስቃስ ተባሂሎም ዝፍለጡ ውድባት፡ ግንባር ሓድነት ኤርትራ ዝበሃል ናይ ሓባር ምንቅስቃስ ከምዘቖሙ ዓዋተ ዳት ኮም ሓቢሩ።

ፕረሲደንት ኢሰያስ፡ ኣብ ዝሓለፉ 18 ዓመታት፡ ኣብ ትሕቲ ምምሕዳሩ፡ ጸጥታ ዝሰፈኖ ፖለቲካዊ ሃዋሁ ስለዝተረጋገጸ፡ ኣብ ቁጠባዊ መዳይ፡ ኤርትራ ኣንጸባራቒ ዓወታት ከተመዝግብ ኪኢላ ክብል ኣብቲ ትማሊ ምስ ተሌቪዝን ኣል ሸርቕ ዝገበሮ ቃለመሕትት ሓቢሩ።

ኣብ መንጎ 22ን 28 ሚያዝያ ጥራይ ኣስታት 314 ኤርትራውያን ስደተኛታት ናብ መደበር ስደተኛታት ሸገራብ፡ ሱዳን ከምዝበጽሑን፡ ኣብኡ እውን ዑቕባ ከምዝሓተቱ፡ ንሓርነት ዳት ኮም ሓቢሩ።

ስርዓት ኢሰያስ፡ ንኣረገውትን ሰበስልጣን እቲ ስርዓትን እንተዘይኮኑ፡ ንኻልእ ዝኾነ ይኹን ዜጋ፡ ናይ መውጽኢ ቪዛ ምሃብ ደው ኣቢሉዎ ከምዘሎ ምንጭታትና ይሕብሩ።

ሎሚ መዓልቲ፡ ንኣስታት ሰለስተ ሰዓታት ዝጸንሐ፡ ኣብ ከተማ ስቶክሆልም፡ ሃገረ ሽወደን፡ ብማሕበር ፍሪ ዳዊት፣ ጋዜጣታት ሽወደንን ሪፖርተርስ ዊዝ ኣውት ቦርደርስ ተወዲቡ፡ ንናይ ኤርትራ ኩነታት ሰብኣዊ መሰላት ዘቃልዕ፡ ዓቢ ሰላማዊ ሰልፊን ምርኢትን ከምዝተኻየደ ካብቲ ቦታ ዝመጸና ጸብጻብ ይገልጽ።

ካብ ንግዳውን ኢንዱስቲሪያውን ባንክ ቻይና፡ ናብ ውልቃዊ ሕሳብ ባንክ ኢሰያስ ኣፈወርቂ፡ ብዕለት 24 ለካቲት ናይዚ ዓመት ‘ዚ፡ ልዕሊ 276 ሚልዮን ዶላር ኣሜሪካ፡ ከምዝተመሓላለፈ ዘረድእ ሰንድ ከምዝተረኽበ፡ ንኣብ ቤት ጽሕፈት ፕረሲደንት ዝርከቡ ምንጭታቱ ጠቂሱ ኣሰና ሓቢሩ።

ስርዓት ኢሰያስ፡ ወነንቲ ትራክተር ዝኾኑ ዜጋታት፡ ትራክተሮም ብህጹጽ ንመንግስታዊ ጋራጃት ከረክብወን፡ ዘየረከበ ድማ፡ ማለት ክሓርሳ ዝተረኽባ ወይ ኣብ ገዝኦም ኣቀሚጦመን ዝተረኽቡ፡ ብኡ ንብኡ ክውረሳ ምዃነን ዝገልጽ መምርሒ ኣውጺኡ ከምዘሎ፡ ባውዛ ተባሂሉ ብናይ ብርዒ ሽም ዝፍለጥ፡ ኣብቲ ካብ ውሽጢ ዓዲ ናብ ኣዝማሪኖ ዝለኣኾ ሓበሬታ ይጠቅስ።

ላዕለዋይ ኮምሽን ውድብ ሕቡራት ሃገራት፡ ኣብቲ ኣብዚ ወርሒ ዝዘርግሖ ንኤርትራ ዝምልከት ጸብጻቡ፡ ቁጽሪ ናይቶም ናብ ምዕራባውያን ሃገራት ዝበጽሑ ኤርትራውያን ዜጋታት ብ 34 ሚእታዊት ከምዝወሰኸ ሓቢሩ።

ስርዓት ኢሰያስ፡ ዝኾነ ዜጋ ካብ 10 ሽሕ ናቕፋ ንላዕሊ፡ ካብ ባንክ ንኸይውጽእ ዓጊትዎ ከምዘሎ ምንጭታትና ይገልጹ።

ሕቡራት መንግስታት ኣሜሪካ፡ ልክዕ ከምቲ ኣብ ልዕሊ ጣሊባን ናይ ኣፍጋኒስታን፡ ኣብ 2001 ዝፈጸመቶ ወራር፡ ብተመሳሳሊ ኣብ ልዕሊ ስርዓት ኢሰያስ ‘ውን ወራር ክፍጽም እየ ብምባል ከምዘፈራርሐት፡ ዝተፈላለዩ ኣህጉራውያን ማዕከናት ዜና ሓቢሮም።